पुणे जिल्ह्यातील ‘या’ पोलीस ठाण्यामधील सहा जणांना कोरोनाची लागण

आळंदी : आळंदी शहर व परिसरातील दहा जणांचे कोरोना तपासणीचे अहवाल पॉजिटीव्ह आल्याची माहिती मुख्याधिकारी समीर भूमकर यांनी दिली आहे. यात आळंदी पोलीस स्टेशन मधील सहा जणांना कोरोनाची लागण झाली असून आता पर्यंत पोलीस स्टेशनमधील एकूण सात जण बाधित झाले आहेत.

यामध्ये चार अधिकारी व तीन कर्मचाऱ्यांचा समावेश आहे. देहू फाटा परिसरातील चार जणांचे देखील कोरोना रिपोर्ट पॉजिटीव्ह आले असून शहरात कोरोना बधितांचा आकडा आता दहावर पोहचला आहे.

आळंदी पोलीस स्टेशनमधील एका अधिकाऱ्याचा कोरोना रिपोर्ट पॉजिटीव्ह आल्यानंतर त्यांच्या संपर्कातील सतरा जणांचे स्वॅब तपासणीला पाठविले होते, त्यापैकी सहा जणांचे रिपोर्ट पॉजिटीव्ह आले असून इतर अकरा जणांचे रिपोर्ट निगेटिव्ह आले आहेत. लॉक डाऊन मध्ये खऱ्या अर्थाने जनतेला कोरोनाचा संसर्ग होऊ नये, म्हणून चोख पोलीस बंदोबस्त देऊन कोरोना योद्धा म्हणून भूमिका पार पाडणाऱ्या पोलिसांनाच कोरोना लागण झाल्याने सर्वांची चिंता वाढत आहे. आळंदी शहरात कोरोना बधितांचा आकडा झपाट्याने वाढू लागला असून एकाच दिवसात दहा जण कोरोना बाधित निघाले आहेत. त्यामुळे नागरिकांनी स्वतःहून काळजी घेण्याचे आवाहन नगरपरिषद व प्रशासनाने केले आहे.