काव्यमंच : तुझे श्रावणा रे प्रस्थ

अरे श्रावणा श्रावणा
शुद्ध सात्विक व्रतस्थ
कथा कल्पित पुराणे
यांचे आता बडे प्रस्थ॥धृ ॥
भाव भोळ्या माणसास
तूच केले बा रे व्यस्त
पुजा कथा पारायणे
नाही राहिले रे स्वस्त ॥१॥
धावपळ जीवनाची
तुझ्यामुळे अस्ताव्यस्त
घर नोकरी संसार
जिणं स्त्री चं झालं व्यस्त ॥२॥
त्यात पुजा पारायणे
किती व्हावे तिने त्रस्त
आता कुठे संशोधिले
व्हावे अस्तित्व उध्वस्त ? ॥३॥
तुझ्या सोमवारासाठी
बिल्व व्हावे का रे नष्ट
झाली वृक्ष तोड अती
तुला सांगते हे स्पष्ट ॥४॥
–निसर्ग सखी सौ.मंगला मधुकर रोकडे.