मावळ तालुक्यातील पवना धरणात 47 टक्के पाणीसाठा

पवनानगर : मावळ तालुक्यासह पिंपरी चिंचवड शहराला पाणी पुरवठा करणारे पवन मावळातील पवना धरण लवकरच पन्नाशी गाठणार आहे. धरण परिसरात मागील चोवीस तासात 37 मिमी पाऊस झाला असून पाणीसाठ्यात 4.55 टक्के वाढ झाली आहे. धरणाचा पाणीसाठा काल सकाळपर्यत 46.73 टक्के इतका झाला आहे. मागील वर्षी आजच्या तारखेपर्यत पवना धरणात 94.17 टक्के इतका पाणीसाठा होता.

    यावर्षी जुन महिन्याच्या सुरूवातीला काही काळ पाऊस झाल्यानंतर मध्यंतरी बराच काळ पावसाने उघडीप दिली होती. पवना धरण क्षेत्रात यावर्षी आजपर्यत केवळ 755 मिमी पावसाची नोंद झाली आहे. मागील वर्षीची तुलना करिता हा पाऊस तीन पट कमी असला तरी  सोमवारपासून मावळात पावसाला समाधानकारक सुरूवात झाल्याने धरणाच्या पाणीसाठ्यात वाढ होऊ लागली आहे. पावसा अभावी रखडलेल्या भात शेतीच्या कामांना पुन्हा वेग आला आहे.

     मे महिन्याच्या अखेरीस पवना धरणातील पाणीसाठा 35.29 टक्क्यावर आला होता. पावसाला जोर मिळत नसल्याने पिंपरी चिंचवड भागात ऐन पावसाळ्यात पाणी कपात करण्याची शक्यता निर्माण झालेली असताना पावसाचे झालेले पुर्नरागमन सर्वांसाठी दिलासादायक असे आहे. 1 जुन पासून पवना धरणाच्या पाणीसाठ्यात 11.44 टक्के वाढ झाली आहे.