जेष्ठ कीर्तनकार ह. भ. प. निवृत्ती महाराज गायकवाड यांचे निधन
महाबुलेटीन न्यूज : प्रतिनिधी
घोडेगाव : आदर्शगाव गावडेवाडी (ता. आंबेगाव) येथील वारकरी संप्रदायाचे ज्येष्ठ कीर्तनकार ह. भ. प. निवृत्ती महाराज गायकवाड (वय ८८) यांचे दि. २२/११/२०२० रोजी पहाटे १ वाजून ५ मिनिटांनी वृद्धापकाळाने निधन झाले.
श्री ज्ञानेश्वर महाराज पालखी सोहळ्यातील अजामेळा दिंडी क्रमांक २६ चे ते चालक, अध्यक्ष होते. गेली ६८ वर्षे त्यांनी आळंदी ते पंढरपूर पायी वारी केली. आळंदी येथील माऊलींच्या मंदिरात, पंढरपूर येथील श्री विठ्ठलाच्या मंदिरात तसेच भामचंद्र डोंगर, गावडेवाडी या ठिकाणी त्यांनी अखंड हरिनाम सप्ताह सुरू केले. कीर्तन, प्रवचनाच्या माध्यमातून त्यांनी साक्षरता, व्यसनमुक्तीसाठी कार्य केले. विविध सामाजिक पुरस्कार देऊन त्यांचा गौरव करण्यात आला होता. आळंदी येथील धर्मशाळा बांधण्यात त्यांचे मोठे योगदान होते.
त्यांच्या मागे तीन मुले, तीन मुली, सुना, जावई, नातवंडे, पतवंडे असा मोठा परिवार आहे. प्राचार्य डॉ. पांडुरंग गायकवाड, पत्रकार डॉ. श्रीरंग गायकवाड व पत्रकार मधुकर गायकवाड यांचे ते वडील होत.
