MahaBulletin — 12 Apr 2026

मँगो पल्प भेसळ उघड:

खेड आणि मावळ तालुक्यात अन्न व औषध प्रशासनाने केलेल्या धडक कारवाईत मँगो पल्पमध्ये भेसळ होत असल्याचे समोर आले. भेसळयुक्त साखर, गाईचे दूध आणि रासायनिक रंग वापरून तयार केलेला सुमारे ३२८२ किलो पल्प जप्त करून नष्ट करण्यात आला, तर ६ नमुने तपासणीसाठी पाठवले आहेत.

दरोडेखोर टोळी जेरबंद:

आळंदी-मरकड रस्त्यावर दरोडा टाकण्याच्या तयारीत असलेल्या पाच जणांच्या टोळीला पोलिसांनी अटक केली. यात तीन विधी संघर्षित बालकांचा समावेश असून, त्यांच्याकडून ८.४९ लाखांचा ऐवज जप्त करण्यात आला.

राजकीय गौप्यस्फोट:

खेड पंचायत समितीचे उपसभापती मंगेश सावंत यांनी माजी सभापतींकडून आलेली दोन कोटींची ऑफर पक्षनिष्ठेमुळे नाकारल्याचा दावा केला आहे. खेड तालुक्याच्या राजकारणातील फोडाफोडीवर ते लवकरच विशेष मुलाखतीत अधिक माहिती देणार आहेत.

आदिवासी भागांसाठी विकास निधी:

खेड तालुक्यातील आदिवासी भागांतील पाणी, रस्ते आणि विजेच्या मूलभूत सुविधांसाठी तब्बल पाच कोटी रुपयांचा निधी मंजूर झाला आहे. यात जलसंधारणाचे बंधारे आणि रस्ते सुधारणांच्या कामांचा समावेश आहे.

महात्मा फुले जयंती उत्साहात:

क्रांतीसूर्य महात्मा ज्योतिबा फुले यांची १९९ वी जयंती चाकण, आळंदी आणि राजगुरूनगर शहरात विविध कार्यक्रमांनी उत्साहात साजरी करण्यात आली. यात प्रतिमा पूजन, काव्य जागर संमेलन आणि वेशभूषा स्पर्धांचा समावेश होता.

कामगारांमध्ये हाणामारी:

माळुंगे एमआयडीसी येथील एका कंपनीत सेफ्टी कटरने कपडे फाडण्याच्या वादातून एका कामगाराने दुसऱ्याच्या नाकावर व ओठांवर कटरने वार केले. पोलिसांनी आरोपी कामगाराला अटक केली आहे.