शिरोलीच्या डोंगरावर दोन तरुणांचा निर्घृण खून

परिसरात खळबळ, घटनास्थळी आढळल्या धूम्रपानाच्या वस्तू

महाबुलेटिन न्यूज / प्रतिनिधी
राजगुरूनगर : शिरोली ( ता.खेड ) येथील खापरदरा डोंगरावरील माळरानावर दोन अज्ञात तरुणांची डोक्यात धारदार हत्याराने वार करून निर्घृण खून केला असल्याची घटना आज ( दि. ८ ) सकाळी उघडकीस आली आहे. एका तरुणाच्या चेहऱ्यावर आणि मानेवर व दुसऱ्या तरुणाच्या हातावर आणि मानेवर धारदार हत्याराने वार केल्याचे दिसून आले आहे.

खेडचे पोलीस उपविभागीय अधिकारी गजानन टोम्पे यांनी राजगुरूनगर पोलीस पथकासह घटनास्थळी भेट देऊन घटनास्थळाची पाहणी केली आहे. घटनास्थळाचा पंचनामा करून मृतदेह शवविच्छेदनासाठी चांडोली ग्रामीण रुग्णालयात पाठविले आहेत. खुनामागचे नेमके कारण अद्याप काय आहे याचा पोलीस पथकाकडून शोध चालू असून या मृत तरुणांची अद्याप ओळख पटलेली नाही. आज सकाळी एक गुराखी खापरदरा या डोंगरावर गुरे चारण्यासाठी गेला असता हि घटना उघडकीस आली. दोन तरुणांचा एकाच वेळी खून झाल्याने त्यांच्यासोबत आणखी काही व्यक्ती असल्याचा संशय पोलिसांनी व्यक्त केला आहे. घटनास्थळावर धूम्रपान केल्याच्या वस्तू आढळल्या असून या खुनाचे कारण व खून करणाऱ्यापर्यंत पोहचणे हे आवाहन पुणे ग्रामीण पोलिसांपुढे आहे.