माणुसकीला काळिमा फासणाऱ्या विकृतीला ठेचून काढण्याची गरज : प्रवीण दरेकर

शिंद-वासुली : “खेड तालुक्यात १७ वर्षाच्या मुलीची विवस्त्र करुन हत्या केली जाते आणि गाव, समाज मयतीलाही न येणे ही माणूसकीला काळीमा फासणारी घटना असून समाजातील अशा प्रवृत्ती ठेचून काढण्याची गरज आहे”, असे मत विधानपरिषदेचे विरोधीपक्ष नेते प्रवीण दरेकर यांनी व्यक्त केले.

खेड तालुक्यातील करंजविहीरेच्या थोपटवाडीतील आरती सोपान कलवडे ( वय १७ ) या कोवळ्या तरुण मुलीची शुक्रवारी (२४ जूलै ) दुपारच्या सुमारास निर्घून हत्त्या झाली होती. कलवडे कुटूंबाचे सांत्वन व घटनास्थळाला भेट देण्यासाठी विधानपरिषदेचे विरोधी पक्षनेते प्रविण दरेकर आले असताना ते प्रसारमाध्यमांशी बोलत होते.

ते पुढे म्हणाले की, “ही घटना घडली तेव्हा राज्याचे गृहमंत्री पुण्यात असताना गांभीर्याने दखल घेतली नाही, पिडीत कुटूंबाची भेट घेतली नाही, म्हणजे हे सरकार किती असंवेदनशील आहे. दिवसेंदिवस महिला मुलींचा विनयभंग व  आत्याचारांच्या घटनांमध्ये वाढ होत आहे. महिला अत्याचारांच्या घटनांकडे सरकारचे दूर्लक्ष होत आहे. त्यामुळे गुन्हेगारांना कायद्याचा धाक राहिला नाही. परंतु आम्ही थोपटवाडीच्या कलवडे कुटूंबाला न्याय मिळे पर्यंत सरकारला स्वस्थ बसू देणार नाही. तसेच पोलीस प्रशासनाने तातडीने तपास करुन यातील गुन्हेगारांवर कठोर कारवाई करावी”.

विरोधी पक्षनेते प्रविण दरेकर यांनी हत्या झालेल्या ठिकाणची पहाणी करुन कलवडे कुटूंबाची भेट घेऊन त्यांचे सांत्वन केले. यावेळी मुलीच्या आई वडीलांनी आम्हाला गावकी, भावकीने वाळीत टाकले असून दोन वर्षांपूर्वी घडलेल्या छेडछाडीच्या घटनेची खुन्नस काढण्यासाठी आमच्या मुलीचा खून केला असल्याचे सांगितले. पाटील, सरपंच त्यांचेच व त्यांना राजकीय वरदहस्त असल्याने आम्हाला न्याय मिळण्याची खात्री नसल्याची त्यांनी कैफियत मांडली. दरेकरांनी कलवडे कुटूंबाचे सांत्वन करुन गुन्हेगारांवर कठोर कारवाई करण्यात येईल, असा विश्वास दिला.

यावेळी भाजपा महिला मोर्चा प्रदेशाध्यक्षा उमाताई खापरे, भोसरीचे आमदार महेश लांडगे, माजी मंत्री बाळा भेगडे, जिल्हाध्यक्ष गणेश भेगडे, तालुकाध्यक्ष अतुल देशमुख, जिल्हा परिषद सदस्य शरद बुट्टे पाटील, पंचायत समिती सदस्य चांगदेव शिवेकर, माजी तालुकाध्यक्ष दिलीप वाळके, तालुका उपाध्यक्ष सुनिल देवकर, संजय रौंधळ, शिवाजी डावरे, रामदास कोळेकर, बाबाजी सोंडेकर, अरुण गाडे, पोलीस उपायुक्त स्मिता पाटील, सहाय्यक पोलीस आयुक्त राम जाधव, चाकणचे वरिष्ठ पोलीस निरीक्षक प्रकाश धस उपस्थित होते.