इंदापूर : कोरोनाविषयक जनजागृती करण्यासाठी इंदापूर पंचायत समितीचे गटविकास अधिकारी विजयकुमार परीट यांनी सुरु केलेल्या ऑनलाईन प्रश्नमंजुषा उपक्रमास तालुक्यातून उत्स्फूर्त प्रतिसाद मिळत आहे. दोनच दिवसात २५८ नागरिकांनी या उपक्रमात सहभाग नोंदवला आहे.
या विषयी माहिती देताना परीट यांनी सांगितले की, कोरोनाबाबत लोक कितपत जागरुक आहे. ते कोरोनाची लक्षणे, त्याच्या विषाणूंपासून ते स्वत:चे रक्षण कश्या पध्दतीने करत आहेत. हे तपासण्यासाठी प्रशासनाने हा उपक्रम आखला होता. कोरोनासंदर्भातील लिंक लोकांच्या मोबाईलवर पाठवायची. त्यांच्याकडून उत्तरे जाणून घ्यायची. त्यावर त्यांना गुण द्यायचे, असे या उपक्रमाचे स्वरुप होते. त्यानुसार आम्ही दोन दिवसांपूर्वी तशी लिंक आम्ही पाठवली होती.
या उपक्रमास लोकांचा अत्यंत उत्स्फूर्त प्रतिसाद मिळतो आहे. दोन दिवसात २५८ जणांनी त्यामध्ये सहभाग घेतला. कोरोनासंदर्भात दहा मूलभूत प्रश्नांची उत्तरे सहभागी लोकांनी बिनचूक दिली. ती जागरुकता केवळ मिळणा-या गुणांपूरती मर्यादित नाही. वैद्यकीय कारणापुरते लोक एकमेकांपासून काहीसे दूर गेले असले तरी, ते वैद्यकीय निकषांचे अनुसरण करीत असल्याचे निरीक्षण परीट यांनी नोंदवले.