महाबुलेटीनच्या वृत्ताची दखल : सोयाबीनचे बोगस बियाणे प्रकरणी लातुर जिल्ह्यात दोन गुन्हे दाखल

लातुर : अगोदरच कर्जबाजारी झालेल्या शेतकर्‍यांनी पुन्हा कर्ज काढुन आपल्या काळ्या आईची ओटी भरण्यासाठी नामकिंत कंपनीचे सोयाबीन बियाणे आपल्या शेतात पेरले. माञ पेरलेले सोयाबीन बियाणे उगवलेच नाही. त्यामुळे हतबल झालेल्या शेतकऱ्यांनी तीव्र संताप व्यक्त केला. याशिवाय महाबुलेटीन न्यूज व लातुरचे माजी पालकमंञी आ.  संभाजीराव पाटील निलंगेकर यांनी हा प्रश्न लावुन धरला होता. अखेर प्रशासनाने या तक्रारीची दखल घेत कृषी विभागाच्या फिर्यादीवरुन शिरूरअनंतपाळ पोलीस ठाण्यात मध्यप्रदेशाच्या सारस अॅग्रो कंपनी विरुध्द दि. १२ जुलै रोजी फिर्याद दाखल केल्याने अखेर गुन्हा दाखल करण्यात आला आहे. लातुर येथील शिवाजी नगर पोलीस ठाण्यात पहिला तर शिरूरअनंतपाळ येथे बोगस बियाणे प्रकरणी दुसरा गुन्हा दाखल झाल्याचे तालुका कृषी अधिकारी साहेबराव आडे यांनी सांगितले.

देशावर व संपूर्ण जगावर सध्या कोरोनाचे महाभयंकर  संकट  सूरू आहे. या संकटामुळे सर्वच क्षेञ डबघाईस आले आहे. यातुन शेतकरीही सुटला नाही. शेतकर्‍याच्या नशीबी आठराविश्व दारिद्र्य त्याच्या पाचवीलाच पुंजले आहे. कधी अवर्षण, तर कधी ओला दुस्काळ त्यामुळे गेल्या तीन चार वर्षापासुन शेतकरी आपला सुखी संसार उघड्यावर टाकुन आत्महत्या करित आहे. या आत्महत्या रोखण्यासाठी शासनाकडुन प्रयत्न केले जात असुनही निर्सगाच्या सपाट्यात सापडलेल्या शेतकर्‍याच्या आत्महत्या काही थांबत नाहीत.

मध्यप्रदेशातील खांडवा येथे कार्यरत असलेल्या मे. सारस अॅग्रो इंडस्ट्रीजचे क्षेञीय अधिकारी राजेंद्र बापुसाजी गुलकरी ( वय ५१,  रा. यवतमाळ, महाराष्ट्र ) यांच्या विरुध्द शिरूरअनंतपाळ पं. स. चे कृषी अधिकारी साहेबराव आडे यांनी दिलेल्या फिर्यादीवरुन शिरूरअनंतपाळ पोलीस ठाण्यात फसवणुक बिबियाणे अधिनियमान्वेये गुन्हा दाखल करण्यात आला आहे. पुढील तपास पोलीस निरिक्षक परमेश्वर कदम यांच्या मार्गदर्शनाखाली पोना. डी. एम. वासुदेव हे करित आहेत.