“मी एक कोरोनायोद्धा” : वाचा कोरोना मुक्त झालेल्या तरुणाचा अनुभव

कोरोना हा एक खूप साधारण विषाणू आहे, फक्त याची जी लक्षणे ( symptoms ) आहेत त्याकडे दुर्लक्ष करू नका.

अलिकडे असे पेशंट ( patient ) भेटत आहेत ज्यांच्या मध्ये काहीच लक्षणे नाहीत पण ते कोरोना पॉझिटिव्ह ( positive ) आहेत, म्हणून घाबरून जाण्याची अजिबात गरज नाही. फक्त आणि फक्त आपली रोगप्रतिकार शक्ती वाढवण्याची गरज आहे. मी चाकण एमआयडीसीतील म्हाळुंगे येथील म्हाडा मधील कोविड सेंटर ( covid center ) मध्ये असताना आम्हालाही हेच सांगितलं होतं.

ज्या लोकांना मधुमेह, रक्तदाब, दमा ( श्वसनाचे काही आजार ) असे आजार आहेत, त्या लोकांना जरा जास्त काळजी घेणं खूप गरजेचं आहे, त्या लोकांनी आपली रोगप्रतिकार शक्ती वाढविणे अत्यंत आवश्यक आहे.

शासनाने  कोविड सेंटर मध्ये खूप उत्तम सोय केली आहे.

पिण्यासाठी गरम पाणी, सकाळी चहा-नास्ता, दुपारी जेवण, संध्याकाळी 6 वाजता पुन्हा चहा, आणि मग रात्रीचे जेवण असे सर्व अगदी वेळेवर ( time to time ) मिळत होतं.

दररोज सकाळी आणि रात्री दोन वेळेस डॉक्टर्स येत होते, ते आमचे बॉडी टेम्प्रेचर ( body temperature ) आणि ऑक्सिजन लेव्हल ( oxygen level ) चेक करायचे. आमच्यापैकी जर कोणाला काही त्रास होत असेल जसे की सर्दी, खोकला, ताप इत्यादी, तर तिकडे ताबडतोब औषध दिली जात होती.

जर कोणाला खूपच त्रास होत असेल किंवा औषध घेऊन पण काही फरक पडत नसेल तर अश्या पेशंटलाला पुढील उपचारासाठी त्वरित दुसऱ्या हॉस्पिटल ( Hospital ) मध्ये शिफ्ट केले जात असे.

कोविड सेंटर मध्ये आम्हाला व्हिटॅमिन सी ( Vitamin C )  आणि व्हिटॅमिन बी ( Vitamin B ) या गोळ्या दिल्या जात होत्या. ज्यात Vitamin C दिवसातून दोन वेळा, चॉकलेट जशी जिभेवर ठेऊन खातो, तशी घ्यायची असते.

Vitamin B दिवसातून एक वेळा, पाण्यासोबत जशी आपण इतर गोळी ( tablets ) घेतो तशी.

या सर्व कालावधीमध्ये आपण स्वतः घाबरून न जाता सकारात्मक राहणे खूप गरचेचे आहे. आम्ही दोघे भाऊ पॉझिटिव्ह होतो, मात्र कोविड सेंटर मधील उपचारानंतर पूर्ण बरे झालो असून आमचे अहवाल आता निगेटिव्ह आले आहेत. तरीही एक सामाजिक बांधिलकी म्हणून आम्ही आमच्या घरात 14 दिवसांसाठी क्वारंटाईन करून घेतले आहे. मात्र माझ्या वडिलांना मधुमेह असल्याने त्यांच्यावर YCM रुग्णालयात उपचार चालू आहेत.