महाबुलेटीन काव्यमंच : नवरात्री विशेष – ज्ञानदुर्गा

✍📚ज्ञानदुर्गा📚✍

घट ज्ञानाचे स्थापूनी
गेली सावित्री माऊली
गोडी ज्ञान अमृताची
हिने आम्हास लाविली॥धृ॥

सारी जीवन सरिता
नावे शिक्षणा वाहिली
दुर्गा अंबा ही भवानी
आम्हा सावित्री राहिली॥१॥

दूर सारा ग अज्ञान
म्हणे सावित्री माऊली
मग जीवनी पहा ग
अहा ! सुखाची साऊली॥२॥

दुर्ग ज्ञानाचे उभारा
स्वर्ग येईल पाऊली
स्वर्ग दुजा न कोणता
म्हणे सावित्री माऊली॥३॥

भगिरथ प्रयत्नाने
हिच्या ज्ञानगंगा आली
ज्ञान अमृतात नारी
सारी आजही नाहली॥४॥

घट भरुन मस्तकी
ज्ञानगंगा साठविली
ज्योत अखंड ज्ञानाची
अशी तेवत राहिली॥५॥

— निसर्गसखी सौ. मंगला मधुकर रोकडे
~~~~~~~~~~~~~~~~~~~~~~~~~~
✍📚✍ ✍📚✍ ✍📚✍
~~~~~~~~~~~~~~~~~~~~~~~~~~